L’avé dabor in késtyon dsi la prododikssion lantiye dann sirk Cilaos ; i paré néna in kriz lantiye sète ané é lé domaz pars sé in kékshoz i sava bien avèk Cilaos — dizon in produi tipik dann in téritoir rényoné. Alor, néna in plantèr la di dann télé, son kamarad dabitide i ramass in tone dë san é sète ané li la ramass sink san kilo. Lo Prézidan la shanm la di l’ané passé bann plantèr la ramass 70 tone é sète ané lé possib zot i ramass solman 25 tone. A suiv mé si lé vré sar in sakré rokilade.

Domaz néna poin in group zékspèr pou suiv lé shoz konmsa é sé kan la fini k’i sipoz kossa l’arivé é kossa i sipoz so foi issi ?

Momandoné néna i moune la soné pou domandé si la pa noute volkan l’otèr vik li la komanss koulé épi larg son bann gaz an plin kan lo léguime té an flèr… In késtyon riské mé pou kossa noute volkan noré poin son linflianss dsi lantiye… Lo prézidan la réponn, bann sèrviss ofisyèl té apré ésèye trouv lo rézon mé li la di késhoz é sa i porte dsi lo gouyavyé.

Pou gouyavyé ossi té pa in bon sézon sète ané é oilak’i akiz galman noute volkan : promyé flèr la bien ténir, dézyèm flèrla pa kolé é bann fèye la séssé. Mi rapèl mèm la rékolt la dékal in moi é pou kèl rézon i koné pa non pli… astèr kossa ni pé dir ?

Ni pé dir i fo anvoye in jenn rényoné fé zétide dans noute bande plantaz — pa demoune déor siouplé — avèk in bon laboratoi épi bann z’antène lobssèrvasion in pé partou oussa gouyavyé i pouss… konmsa nou va dir, i vo myé prévnir ké guérir é la syanss sé in bon rokour kan lé shoz i goupiye pa konm i fo. Sa lé inportan si ni vé trape noute lotonomi alimantèr é mwin néna konm l’inpréssion bann sindika plantèr lé sanssib bann késtyon konmsa.

Astèr alon pa konfonn la vitèss avèk la préssipitassion. Zot i koné léspri kréol i yèm vangué sa. Donk donn ali labitide bann zétide syantifik bien bazé dsi létide la réalité, pars sansa in néstan son léspri va mète a plané san rézilta fyab.

A bon antrandèr, salu !

Justin

NB zot i rapèl kan létshi la pa doné in sézon ? Kissa i rapèl pou koué ? Mwin pèrsonèl mwin la pa antann lésplikassion si néna inn