Si ou lé in moun étranj é si ou i viv dan la Frans, nana désèrtènn shoz ou i pé fèr é na d’ot ou i pé pa. Ou i pé angaz dan la léjyon étranjèr... i prétan dir, dopi 1831 ziska 1962, nana ziska sisan-mil moun étranj la angaz dan l’armé fransèz. Ou i pé galman okip bann plas travay bann Fransé, fi-t’in tan, té i èm pa konm travay. Mi ansouvien an aoir vi bann moun l’Afrik apré kour déyèr kamyon poubèl, sansa manyé marto pikèr, sansa ankor travay o-noir dan bann réstoran. Zordi i di konmsa, nana in bon pé l’infirmyèr, in bonpé médsin i travay an Frans dann l’opital. Ou i pé mèm zoué dan l’ékip do Frans rigbi si na in bon koup de tan ou i zoué balon oval dann in l’ékip an Frans. I pé mèm anvoy aou dor dan la prizon si ou la fé in gro kouyonad. Ou i pé pèy z’inpo... ou i doi mèm pèy z’inpo.

Na in n’afèr ou na poin lo droi fèr : ou na poin lo droi pou voté sof si ou sé in sitoyin éropéin. L’èr-la, ou i pé, mé pa pou bann z’éléksyon lokal, pa pou bann z’éléksyon rézyonal, z’éléksyon dépité ou bien sénatèr. Poitan, nana lontan i anparl de sa, i anparl done lo droi bann moun étranj pou vote dann z’éléksyon lokal. Na lontan la gosh la promète sa, mèm in pé d’moun la droit la di zot lé dakor èk sa. Lo pti prézidan Sarkozy la di, li lé pa kont sa, mé son manda i sava fini é li la pa fé. Romark bien, késtyonn promès, li lé pa vréman pirate. Konm di lo kont, promèss, sé dète, mé solman pou sak i kroi sa.

Mi sort antann dann radyo bann la droite popilèr i sort di, sa in n’afèr zot i vé pa. Zot i vé mèm lans in pétisyon pou fé sign plis demoun la vote pou primèr sitoiyène. Mé a bien réflèshir, sa sré pa ankor in moiyin pou lo pti prézidan pou sifone bann z’éléktèr Marine Le Pen. Moin lé pa sir, mé sa in n’afèr lé bien posib, é sar pa promyé foi Sarkozy nora amène demoun an sharèt shaviré konmsa. Lé vré, so boug-la, pou in sharjèr d’lo patanté, sé in sharjèr d’lo patanté.

Justin