Oté

Votaz, Partisipasyon ? Ok ! Mé si sé pou la po d’patat kont pa dsi la foul bann gran zour

Justin / 12 octob 2020

JPEG - 43.6 ko

Koméla néna in gran sobatkoz. Li port dsi lo partisipasyon zéléksyon. Sobatkoz-la i port dsi lo nonm bann votan kan néna in votaz. Désèrtin i di lo nonm votan i diminyé é zot néna bien rzon. Mé dsi kosa zot i baz azot ?

Ala in zéléksyon pou ronouvèl in dépité pars lo dépitan ranplasan madam Bello la mèm pa vouli aksèpt lo post pars dizon sa in vré kokiye vide. Pars li téi viz in n’ot, sète prézidan La Réjyon. Pa in kokiye vid sète-la, in kokiye a ranplir é nout kamarad Paul Vergès avèk son lékip la bien konète ranpli ali avèk in bann prozé valab. Mé Paul Vergès lété Paul Vergès, pa in dézyèm kouto ni in troizyèm.

Donk ala in post pèrsone téi vé pa vréman, mèm si l’avé in bonpé kandida, é in pé la désid donn sa in zèf la pankor éklo é pétète i éklora pa zamé. Mé sa lé zis pou dir lo baz diskisyon lé pa korèkt.

Astèr, dovan nou néna in zéléksyon pou bann konsèye départmantal : ok ! Mé zot i pé dir konmsa, d’in fason otomatik, kosa sa i ansèrv. Pétète bann éspésyalis lo droi i pé dir, mé nou, lo bann ti kolon, ni gingn pa di sa nou ! Alor si lo moun i vote pa-sirtou néna dé zéléksyon an mèm tan - i fo pa nou lé étoné. Dann inndé kanton va fé in pé wati-watia, mé kont la dsi pou in bon partisipasyon ? Kont dési, fyé pa tro !

Aprésa nora zéléksyon konsèye réjyonal ? Va soubate pou koué ? pa sir lo moun va trouv zot kote shokola ladan. Mi oi déza sa konm in gran l’annuiman. Konmsi lo moun la Rényon i koné déza par avans kisoi inn, kisoi l’ot, i fo pa kont la dsi pou élimine lo bann malédiksyon i pèz dsi nou. Lo néokolonyalism i vèye o grin é la pa son sousi si na poin bonpé votan. Gouvèrnman fransé i vèye o grin éli sousyé solam pou adfébli nout pèp.

In prozé rényoné A tou lé kou sa lé intérésan. Mé lo portèr so prozé-la ? Li lé sou tèr sirman, li la pan kor éné-li lé dan la kok’é dan la kok i gingn pa kass kate pate in kanar. Alor : votaz ? partisipasyon ? Ok mé si sé pou la po d’patat, kont pa dsi la foul dé gran zour.