I prétan dir, in lintéréssan la ékrir dann in zournal la droite, Parti kominis i sort rann ali kont, par li mèm, nana ankor pov La Rényon, épi li la anvoy son patoi : « Mieux vaut tard que jamais ! ».
Son kozman lé si tèlman fo, moin té i domann amoin si té i falé rolèv ali, sansa lès kassé ! Moin la profèr pa lès tonbé, mèm si mi koné ké réponn in kouyon sé pèrd son tan pars mi koné galman in pé i kroi k’in mansonz ou i répète mil foi, aprésa li arsanm in vérité !

Poitan, pou éte in mansonz sé in mansonz. Pars pou kossa Doktèr Vergès la domann départman fransé si la pa pou konbate la mizèr ?
Pou kossa nout parti la lité, la vanjé, la pran lo risk pran déssi son doi kan téi rofiz aplik bann loi sosyal ?
Pou kossa ankor Laurent la di : « Nou lé pa plis, nou lé pa moin, réspèkt anou ! », kan gouvèrnman té i vé pa légalité sosyal ?
Pou kossa nou la domann érémi konm an Frans, R.S.A. konm la-ba, la rotrèt galman ?
Pou kossa ankor ni dénons la vi tro shèr si la pa pou bann moun pov gingn z’ot soso in pé konm k’i fo ?

Alors, siouplé, si in pé lo vant i fémal ? Pran ganidan ! Si na la fyèv ? Boir tizane ké d’sériz ! Si sé pou koz la boush rouvèr ? Fèrm z’ot také, sar myé pou zot, sar myé pou nou, sar myé pou sak i lir zournal la droite !
Konm di lo kont : mantèr i vyin volèr ! É volèr i prospèr pa !
Lé tan li lès son plime ropoz in pé :"vyé motar ké zamé !"

Justin