Mésyé lo Prézidann La Frans, ou i rapèl so pti kou d’konfineman ? Na poin lontan vi k’sa l’ariv moi d’mars é si mi tronp pa ou la di la vi d’apré Lo covid, sar pi ditou parèye ké la vi d’avan lo covid é la manyèr pou gouvèrné va shanj san pour san rant lo avan é lo apré. La prèv ? Ou la shanj promyé minis, é mèm plizyèr minis, an parmi sète l’outromèr. Si tèlman lo foto lo nouvo gouvèrnman la pa konm sète lo l’ansien.

Dakor, sa sé in promyé zafèr mé sa i fé pa in nouvo politik pou l’instan é sé so nouvo politik-la ni yèmré oir arivé é lo pli to sar lo myé… Alor, mésyé lo Prézidan, mi propoz aou in kékshoz : Mésyé lo Prézidan, pèrmète amoin rapèl aou kékshoz. Shak foi k’i n prézidan i ariv é dopi dé zané é dé zané, i roganiz i gran zétazénéro dann bann téritoir loutremer - é isi osi pou la Rényon - shak foi pou tash moiyin fé in plan pou tir anou dann l’anboulkidi.

Mi sava pa dir aou tout plan la fine fé isi shé nou, mé si out minis loutremèr i domann son bann sèrvis pou alé shèrché, forsé va rotrouvé, é si zot i rotrouv mi propoz aou in métod : étidyé inn par rapor a l’ot, épi a l’ot pou oir dodan lo parèye é lo pa parèye. Aprésa i fo étidyé lo bann politik la fé é pou oir koué k’la marshé é kouék la foiré. Pou finir, i fo triyé la paye épi lo grin : gard sak la marshé é zète sak la foiré. Mé sirtou san obliy razout sak la zamé razouté émi konpran amoin kan mi di sa.

Déza in kékshoz mi pé di dann out zorèye par raport nout parti : shak foi la domann bann parti pou prézant zot propozisyon, nout parti la touzour réponn prézan é zordi ankor li l’apré prépar ali pou réponn out késtyoneman, si ou i désid késtyone anou… Pou kosa mi di aou sa mésyé lo Prézidan ? Pars lé pa touzour fasil pou komans in travaye dann in fin d’manda. In pé va pans ou i tonm in pé tar mé konm k’i diré : vyé motar ké zamé ! myé vo tar ké zamé ! Parol in pti kolon.