Mi pans zot i souvien sak l’ariv z’éléksyon réjyonal. L’ariv in bonpé z’afèr pou amèn Didier Robert konm prézidan. Mi vé pa parl solman lo trikmardaz Parti sosyalis, mé sak madam Huguette galman. Pou kosa mi vé anparl de sa ? Pars sanm pou moin, dépi tan-la madam Huguette la désid alé afront Parti kominis pou fé valoir son manyèr fé la politik. Dépi tan-la, moin lé sir é sèrtin èl la prépar aèl mèm pou trayi nout parti si èl té i doi trouv son kontan, épi si bann anti nout parti té paré pou bat tanbour pou èl.

Promyé tour, èl la pa domann vot pou pèrsone. Sé sa k’èl la di dézyèm tour. Dézyèm tour, èl la pa fé son shoi rant bann kandida, mé èl la di, pli d’in foi, èl té i trouv pa bien TAK té dsi la list Paul Vergès. Pou kosa ? Pars bann kominis épi bann fanm l’avé roprosh pou fé TAK. Lé vré, dann tan-la, lo boug épi son bann partizan navé d’zafèr dsi zot konsyans. Pou dir la vérité : lo boug té pa in sin, té pa li té i fo done bondyé san konfésyon... Mé Paul Julius Bénard la, sa té in sin sa ? Mi pans pa é bann kominis Sin-Pol té i koné in réyon dsi son l’éspri démokratik.

Mé voila pa ké nana dé troi zour, la komine la fé rafistol lo éstad i port lo nom Paul Julius Bénard pou kat milyon l’éro. Moin la pa tro antann désèrtin koz for la dsi. Myé k’sa, la fé in l’éstati mésyé Bénard. La pa tousa, la invit la famiy Bénard pou vni. D’apré sak Alain Bénard la di, la rolans azot in bonpé foi. Konm pou bien amontré, lo pasé sé lo pasé, épi madanm Bello la bien bézoin la droit dan son batay kont Parti kominis. Mank de po ! Konm la droit la désid mouvman lé bon pou kapot lo madam z’éléksyon lo mèr 2014, banna la pa vni konm pou réponn aèl, tardra vyindra, na in zour i apèl domin.

Pou moin pèrsonèl, mi pans pa k’i fo zoué lo vyèrz faroushé l’ané 2010 pou pèrd la mémoir dsi in pasé doulèr pou bann kominis l’ané 2012.

Justin