Mézami, zot i koné de toutan demoune i panss bourik lé antété. Zot i koné parétil si li vé pa travèrss in pti flak dolo, néna arien pou fère, li travèrss pa. Mi koné pa si sa lé vré pou vréman, pars mwin la trouv in provèrb i di lo kontrère. Bon pou sa même !

Mé lo provèrb i di la pa moiyin fé boir ali d’lo… si li la pa soif. Sète-la mi kroi é la pa bézoin ou néna afèr avèk in bourik. Demoune ossi i pé z’ète konmsa. Si i vé pa boire, li vé pa boire, é li bouire pa même si wi pinss son né.

Mé mwin la fine lir kozman-la dann in lartik dsi lamontraz. I di konmsa si in marmaye i vé pa aprande lékol-pars li lé dégouté d’sa, sirman – konte pa oblize ali aprande é sa lé bien vré. Mi panss wi pé aprande si wi trouv in plézir ladan, sansa si wi vé abssoliman ariv in rézilta… Mwin la bien di in for volonté, pa in pti lanvi, ni in kapriss. Mi panss zot i konpran amwin.

Alé ! Mi kite azot rofléshi la dsi éni artrouv pli d’van ? Sipétadyé.

Justin