Mwin la lir par-la lo Prézidan lamérik téi koné pa oussa i lé lo détroi d’Ormuz é kossa k’li ansèrv oziss. Mwin la lir par-la Prézidan téi koné pa oziss linportanss lo détroi dsi lo poinn-vizé komèrssyal, dsi lo poinn-vizé ékonomik, épi par raporte la kantité pétrol i pass par détroi-la.

Mwin la lir par-la Lamérik la déklansh la guèr sinploman pou ranporte bann zélékssion mi-manda épi pou assir son pouvoir ziska la fin son dézyèm manda… Mi sorte antann lo Prézidan apré dir si son parti i ranporte lo zélékssion shak éléktèr va gingn in prime sink mil dolar.

Mi panss toussala lé vré é bann travayèr La rényon i tir lo dyab par la ké par rapor in shoi malfé… Pou kossa mi di sa, pars dann tan Paul Vergès té prézidan la réjyon li l’avé drèss in plan pou lotonomi énèrzétik avèk in miks énèrzétik pou pèrmète anou sifir par nou mèm pou La rényon assir son lindépandanss énèrzétik é pou bann rényoné évite tonm dann pyéz lo tou otomobil.

I paré bann otomobiliss nout péi i sèye fé zékonomi léssanss, épi gazoil, i sèye pa tro dépanss pou ashté léssanss épi gazoil… Donk ni pé dir sé par la fote l’amérik nou lé dann in tablatir konmsa ; ni pé dir sé par la fote l’Iran nou lé dann in mové pa konmsa… Oui, mé nou, Kèl shoi nou la fé ? Kèl solissqion l’avé é kèl nou la shoizi… Nou ossi nou la fé lo mové shoi é zordi nou lé pri dan la min korbo konm i di dann shanté kabaré.

Koman ni ansort anou éstèr ? La fuite an avan ? Lé touzour possib mé la kilbite lé o boute… Biensir nou lé dann la tablatir par l’amérik, Israel, La franss… é nou mèm nou lé pou arien ladan ?

A bon antandèr salu !

Justin