Mézami, mi pans zot tout i koné kozman-la, pars demoune i ansèrv dé li zordi ankor, é bande zansien téi ansèrv sa dann zot tan é mi majine dan l’avnir sar ankor parèye.

Mé mi rapèl azot in kozman bien koni k’i di : « kroi la moityé d’sak ou la vi, la moityé galman sak ou la antande mé kroi pa sak in moune la di aou li la vi sansa antandi. ». Sa i vé dir souvan dé foi in témoignaz la pa fiab é avan baze out lopinyon la dsi, pran prékossion.

Toute fasson lé vré in sèl vré témoin va done aou in sèl lopinyon, é pa forséman assé pou fé éklate la vérité é sa i rapèl amwin in léspréssion mwin la fine antand in bonpé foi é i di konmsa : « Testus unus, testus nulus » – in sèl témoin sé konmsi ou na poin, mé antansion sa lé vré solman dann droi pénal.

Alé ! Mi domande azot rofléshi la dsi, é ni artrouv pli d’van. Sipétadyé.

Justin