Médam, zé Méssyé, la sosyété, koze èk mwin sé koze èk in kouyon, mé sé o péyé d’lo mir k’i oi lo masson. Mézami, mi panss zot i koné kozman mwin la marke an-o - la. Antouléka, zot i koné sirman si zot i ékoute bande radyo pars souvan bann zékoutèr i di sa. I ariv amwin a rode lo sanss bande kozman konmsa é kan mwin la fine trouv ali apopré mi rode son limite. Ni pé dir la pèrsone i di sa, i vé dir si son zanfan lé malfondé sé pa par li, pars d’apré li, li lé pa résponsab lo santiman son zanfan... Ni pé arète tèrla, mé ni pé domandé si lé vré, si lé pa vré. Pou kossa ? Pars néna poin in lormone lo bon santiman. Sé in késtyon d’édikasyon é lédikasyon èl mèm i done bonpé zafèr : lébzanp ala la nouritir lo santiman. Bon légzanp i pé done bon santiman mé la pa di lo zanfan i pran pa lo kontropyé lo santiman son paran et pou kossa, Pars li la vi dovan son zyé lo kot-légzanp. Zot i oi lé shoz lé pa sinp é sé pou sa mi kite azot rofléshi la dsi é fère zot mèm zot rézon. Ni artrouv pli d’van, sipétadyé.

NB in zour in moun la di amwin, li la pran labitide pi siporte la rolijyon pars li la parti lékol privé. Mé in n’ot la di amwin li la pran labitide pratik la rolijyon pars li la parti dan lékol privé. Alor ki ki pèrde kiki gingn ladan ? In foi in moun la di amwin li la vni in bon moun pars li a viv dann in l’anvironeman lamour. Mé in n’ote la di amwin li détèst l’amour, pars lé konm in shène dann pyé.. L’imin la pa in lantité matématik, i fo kroire.