Médame, méssyé, la sossyété, koze èk mwin sé koze èk in kouyon, mé sé o pyé d’lo mir k’io oi lo masson.

Mézami, zot va kroir amwin si zot i vé, mé provèrb-la i sorte l’Afghanistan mé mi koné pa si néna ankor in bonpé zirondèl laba, afors fé a guèr, i étoneré pa mwin ké la nyabou tyé la natir. Dan la franss – i di galman in zirondèl i fé pa lo printan : la prèv k’i fo in bonpé pou anons vréman lo bèl sézon. Mé alon arparl lo kozman mwin la mark an-o la sinploman pou dir, alon méfyé l’om, napwin arien lé déstruktère konmsa : li détrui sak lé zom avan li la fé, é aprésa li détrui la natir é la pa bézwin sorte l’afghanistan pou fé zafère konmsa. Nou rényoné, zot i koné nou la détrui é par dsi détrui zoizo-li, papiyon li, zinsèk li, lé zom non, nou la fé ké goumanté. Ala pétète lo rézilta. An parlan d’zirondèl, mi rapèl lo tan l’avé in ta koté la kaz, mé astère néna pi ditou. Rézilta ? Ni koné pa ! Nou lé si tèlman ignoran ké ni koné pa lo rézilta.

Alé ! Mi kite azot rofléshi la dsi é ni artrouv pli d’van. Sipétadyé.