Zordi, mi mazine bann jenn i sa pran l’aviyon,pou artourn dann zot péi ké zot i koné pa. Gouvèrnman la déside Créteil-iz azot. A ! Zot la byin travay. A ! Zot la nyabou pass gran-gran konkour l’amontrèr. Zot lé paré pou alé la-ba, zot lé bon pou alé travay dann Créteil. Travay issi é travay la-ba sé travay ? Plin an son, plin an farine sé plin ? Mé zot madam ou byin zot méssyé ? Inkyète pa !Toute fasson, moi d’séktanm in bon pé i sar pointe shomèr. Sansa in bonpé la zamé travay pou in grin. Alor l’ote, sak i sava, va sokour la bann.
Zordi mi pans galman bann tète moin la vi avan-ir-osoir dann télé. Katsan sinkante amontrèr garanti, norm fransèz (NF). Zot nana lo droi fé l’amontrèr. Zot lé bon pou sa mèm. Vi k’zot la tète délé la mèr patri. Vi k’zot lé blan é zot i vyin an missyon-pétèté san savoir ! Pétète a l’insi d’zot plin gré — pou albosantriz anou in pé, zis sak i gingn, zis sak i fo pou koup-koup nout rasine... Issi, konm in moun la di, sé aryin k’bann nèg é aryink bann pite. Blan ou byin noir ? Toute la bann sé in bann nègr, konm dann tan visréktora. Épi, banna i vyin issi pou déshovaz anou in pé... konm in poète rényoné la di.
Méssyé lo prézidan Sarkozy, lo sis novanm lané 2009 té in gran zour. Ou la di in ta z’afèr intéréssan. Ou la, konm di lo konte, koz san tabou, koz san filé. Na lontan bann rényoné, an mazorité, téi atann in n’afèr konmsa. Mé aprésa ?Kossa la éspassé ? Aryin ! Pli pir k’aryin, lo rotour dann passé. Out bann zès é sète out gouvèrnman la divors ansanm-avèk out bann parol. In pti limyèr la kléré, dann la tinèl, mé out politik la dévir lo do pou armonte dann gro fénoir. Ya bon ! Ya bon diskou méssyé lo prézidan !

 Justin