Lotrozour moin té apré agard zinformasyon dann télé é moin la antann in rokritèr pol anploi apré di néna in zourné l’anploi é lo boug la site in pé tout kalité métyé té i domann zour-la. Té i domann sèrvèr, téknisienn sirfas, tit min dann la koutir ; té i domann ankor lo moun pou fé la plonj épi, sanm pou moin, in bann travayèr san éspésyalité.
Konm mésyé lo prézidan té apré di in avèk in zardinyé : ou i koup soman shomin, ou la fine trouv travaye kisoi dann kafé, kisoi dann réstoran. Bann métyé pa tro péyé, in pé fatigan, épi i fo ou i travaye dann lo tan normal mé sirtou a kontrotan… Mi sipoz landomin bann jenn lété foulé pou rode bann travaye-la é sirman in pé la gingn boulo. Lé konmsa ! kosa ou i vé fèr ?

Na poin travaye donk si ou i trouv, mèm pou alé loin, mèm pou sote la mèr, ou i sote la dsi konm in mor-la-fain. Isi na poin travaye d’apré sak i di, mé néna kant mèm in bonpé travayèr i sort déor pou travaye isi mé d’apré sak i di, isi sé bann métyé shoizi.
Zot i kroi pa moin ? Ébin figir azot, dann nout zournal Témoignages, i paré bann sosyété i fé z’ot bèr isi La Rényon i sava Paris pou shèrch bann pèrsonèl l’ankadreman avèk zavantaj mi di pa ou, avèk in bon moné pou gonf lo pla, avèk vakans asiré siouplé... Sa lé vré mèm sa, é sa i fé lo buzz dopi kékzour déza.

Moin lé a d’mandé pou kosa bann sosyété la i anbosh pa isi La Rényon, isi sir plas. Pou kosa i sava rode bann komandèr laba, pou komann bann travayèr rényoné isi. Larzan kréol lé bon pou lo kont an bank, mé lankadroman kréol la pa bon.
Ya bon larzan kréol ! Yapabon l’ankadroman kréol !