Si bonpé d’moune la sové, lé pa lo ka d’Yacouba pars li o kontrèr li la shoizi d’rèss dann son landroi é plante la foré pou anpèsh lo dézèr avanssé. Tro d’séshrèss mé Yacouba la fouye bann trou dann la sézon sèsh pou la plui kan èl téi ariv, èl téi rèss landroi èl la tonbé é la tèr té mouyé donk bon pou rossovoir in pti pyé d’boi sansa in sinp plantaz..

Li la plante konmsa karante éktar mé la parti té pa gagné d’avanss pars demoune téi roprosh ali fé sa son bann trou é mèm téi panss li lété in pé sorssyé dsi lé bor : in kou l’arash son bann pti pyé d’boi, in kou la mèm atak ali pars bann sorssyé dan l’androi téi akiz ali pa réspèk la tradission poitan sé bien la tradission, lo zaï li l’avé romète an viguèr sé mèm la tradission bann fézèr la plui li la ansèrv.

Anfin, koman koman li l’ariv a plante in gran foré é bann zoizo épi bann zanimo la vni pou ropèp landroi. Yacouba la fé l’amontrèr, li la aprann demoune koman fèr konm li pou planté é pou fé léllvaz si tèlman lo dézèr l’arète avanssé é sa téi éspass dann bann zané 1970-1980. La mète lo tan avan k’i rokoné son jéni mé la fini par rokonète é la popilassion la rovni pou konstrui bann nouvo vilaz épi instal azot. Kan li lé mor l’om l’avé gingn son konba konte lo dézèr é bann zinstitission kom lo Pri Nobèl épi l’Onu l’avé rokonète son mérité.

Zordi li lé mor, mé li néna in garsson la pran la rolèv é si néna in la-o mwin lé sir lo papa lé kontan oir la rolèv assiré é demoune instalé dann la réjyon.

A bon antandèr salu !

Justin