Lèr moin l’apré ékri l’aviyon Air-Madagascar i sort poz dsi lo tarmak l’aéropor Plézans. L’aviyon-la i amenn lo pap dann Moris pou inn vizite ofisyèl-Lo Pap sé in shèf d’éta- é pou rann vizite in gran kantité d’moun : la Télé i parl san mil pèrsone – i partaz la rolijyon katolik épi tout rolijyon demoun i pratik dann La Répiblik Moris, nout voizine, lil sèr konm in bonpé néna l’abitid dir.

Moin pèrsonèl, isi la Rényon, moin lé in pé loin.Mi pouré dir mon bann zinprésyon dopi isi shé nou a travèr lékran télé.Mé mi koné pa pou kosa in bann rogré i anvayi mon tète, i anvayi mon kèr.Dabor, mi domann amoin pou kosa li la fé lo voiyaz li la fé pou pass o larz par raport nout péi.Mi rapèl dèrnyèr foi in n’ot pap- lé mor koméla -la vni rann anou vizite. Sète-la non ! Domann pa moin pou kosa, mi koné pa é moin la pa trouv in répons konvnab dann bann zoinal.Pétète pou sa mon léspri lé in pé anbriyé l’èr-kilé.

Apré mi rofléshi épi mi di, dann mon kèr, lo pap la parti Mozanbik, in gran péi l’Afrik avèk in bonpé problèm é mi souète, pou li, in bon l’avnir. Li la parti galman Madégaskar, in péi pli gran K’ La frans késtyonn zéografi(i paré i fé La frans+La Beljik ansanm avèk), in péi pov, mé in péi avèk d’apré sak mi kroi in gro potansyèl dévlopman.Zordi li lé Moris : in pti péi ?Mi pans pa ! Pars dsi lo poinnvizé lo dévlopman néna pou fèr laba é konm i di souvan : ti ash i koup gro boi,pti kouto i koup gro jiromon.

Bin alor nou ?Moin sré tanté d’dir : « kosa nou la fé Bondyé pou ète bordé konmsa dopi in koup de tan ? ». La frans la éfas nout nom dsi tablète la COI : bordé k’sé bordé !Bann péi l’afrik i sava fé i gran zone libréshanj-talèr lo pli gran zone libréshanj néna dsi lo glob térès é nou dann tousa ?Nou va rèss dovan la port, an déor.Va inpoz anou bann zakor parténarya-mé pa parténarya avèk nou- pars ni koné mèm pa koué néna dodan, é si mi oz dir avèk kèl sos kari i sava manj anou.

Ni parl toultan mète Rényoné anlèr , mète La Rényon anlèr !Mète ali anlèr,sansa pous ali dann kivète ? Nou lé fyèr nou, nou néna nout lonèr, nout fyèrté, pétète mèm nout lorgèye.Alor kosa l’ariv anou ? In malédiksyon la tonm dsi nou ? Nou lé an marj pou la Frans épi pou lé zot ! Nou lé konm grinn bébé dann panyé mayi.Mé mi koné pa pou kosa ozis lo pap la pa vni oir nou. Li la obliy anou don ?

Justin