Mé wala, vitman-vitman bann z’imanitèr laba dann La Franss épi dann l’Erop la akiz azot fè lésklavaz déguizé é souvan dé foi sa lété la vérité vik’zot téi kontante azot rashète la liberté bann demoune viktime la trète. Sé l’èr zot la désside rotourn azot par koté d’linn pars laba l’avé in kantité d’moune téi rode travaye. Sé konmsa ké gouvèrnman La Franss la désside pass in zakor avèk gouvèrnman zanglé pou anbosh bann travayèr péi tamoul konm zangazé.

Pou sa téi fo sign in kontra zangazman : bann zangazé téi gingn zot manzé épi zot lojman, épi in salèr in pé fèb mé pou bann zindien, dann tan sa téi aparé azot konm sifizan… Lo kontra té signé pou sink an é apré sinkan, an prinssip, bann zangazé té lib artourn shé zot osinonsa kontinyé in nouvo péryode sinkan. I fo dir in pé partou oussa l’avé zésklav bann propriyétèr la anbosh bann zangazé. La fé konmsa laba Maurice, la fé sa laba dann Chagos épi in pé partou dann landroi l’avé zésklav… Mé antanssion sa la pa éspass san problèm pars in promyé foi la anbosh bann Télugu é sa la pa marsh ditou si tèlman banna la désside rotourn shé zot.

Avèk demoune péi tamoul sa la marsh myé é banna la vni La Rényon an kantité — inpé pliss ké 140000 pandan lo tan ké lo sistèm la duré. Téi tonb bien pars banna i koné travaye dann kann épi dann bann pti lizine té i komanss pouss in pé partou. 1880 par-la lé shoz la komanss gaté, pars bann zangajist téi pèye pa konm k’i fol o zangazé — dé foi téi sote in moi, dé moi parla é par dsi lo marshé bann zangazé té oblizé ashté zot fournitire dann magazin bann blan si tèlman ké zot l’avé in ké d’larzan téi trène par si parla, é kan téi ariv pou rotourn dann l’Inn téi falé travaye ankor in pé pou paye sak i doi dann magazin.

Arzoute avèk sa an parmi bann tamoul téi fé vnir arienk bann bononm é pa d’madam si zot i vé téi falé fé l’akostaz avèk bann madam déza sir plass donk bien annuiy épou rotourn shé soi… Souvan dé foi bann travayèr téi sava porte plinte avek lo roprézantan Langlétèr si tèlman lo kontra lété mal apliké. Anfin, in zour, lo 11 novanm 1882 Langlétèr kla désside kass lo bann kontra é wala la sours zangazé koupé... Mé langzism la pa arète la pars finalman bann dèrbyé zangazé lété bann Rodrigué la vni shé nou dann bann zané 1934-1935.

Nou la komémor labolission langazman lo 11 ? Pars la fédération tamoul la propoz néna pliss 20 an fèr in sèl komémorassion é toute la tonm dakor pou shoizi lo 11 novanmm. Mézami si ni lir bann tèks dsi la vi bann zangazé sir ké lé té pa in paradi mé in tan noute listoir in pé myé ké lésklavaz, in pé pli pir lo tan la kolonizassion, mé bien pli an bob ké koméla pou la késtyon bann droi sosio.

Alor, pou kossa. A bon antandèr salu !

Justin