Oté

« Yèr toué t’apré manz avèk shien sovaz, zordi ti souplègn avèk ton mètr »

In kozman pou la rout

Témoignages.re / 12 septembre 2019

Mésyé, médam, la sosyété, I paré, in moun l’avé in gran park volaye épi li l’avé galman in bèl shien pou gardien .Li la di avèk lo shien : « Avèye bien mon volaye, pars lo shien sovaz lé riskab ataké ! ».

o shien la ataké é la fé in déga inkroiyab an parmi lo bann zanimo.Lo matin kan lo mètr l’arivé déga té fine fé é son bon shien la vni frote son tète dsi son zanm an souplégnan si tèlman li lété abatu par lo déga an parmi lo bann zanimo.I falé oir konm li téi fé pityé ! Mé in vyé kok l’avé gingn sov son po la di ali : « Aou shien ! zordi ou i plègn é ou i souplègn, mé ousa ou lété yèr soir kan bann shien sovaz l’ataké ?Ou lété ansanm, sépa mèm si ou lété pa komandèr ladan ? ».

Lo mètr la rogard son shien é l’èr d’pityé la transform an l’èr d’koupabilité...Kosa zot i anpans de sa ? Sa i rapèl pa zot in pé la vré vi sa ? Konbien i fé doub zé dann la vi la : i fé bon figir lo matin é lo soir i pik kouto dann do.

Alé ! Mi kite azot rofléshi la dsi é ni artrouv pli d’van. Sipétadyé !