Défoi, ou i antan in nouvèl, apré ou i pans pi : pa pars la rant par in trou d’zorèy épi la arsort par l’ot ! Plito pars ou i mazine in n’ot afèr épi nana si tèlman nouvèl, lé dir pou ramas tousala tout-in-kou. Poitan, na dé foi ou i aprann in n’afèr i vo la pènn ramassé, épi kalkil si sa i pé pa ète in bon légzanp pou out péi, pou out pèp. Tout sak lé bon pou mon péi i rogard amoin non ? Konm i rogard tout demoun i vé oir son péi anlèr.

Mi pans zordi in nouvèl i konsèrn la Bolivi : péi-là la niabou bate lanafabétism atèr. Sa in gran nouvèl sa ? I prétan dir bann péi plito rish konm Larzantine, Shili, sansa Brézil la pankor niabou fé in nafèr konmsa. Poitan, la Bolivi-là, sa in péi pov. Bann moun té i koné pa lir lavé an kantité.
Koman la fé ? Pou komansé, banna la pran modèl déssi Kuba é déssi son métod odio-vizièl : soisant-sink séans dann télé é ou i konèt lir, avèk in pti liv léktir pou akonpagn le moun l’apré aprann... Kuba épi Vénézuéla la done la min. La pran dé z’ané, mé la fini avèk lanalfabétism. Pou sa la ansèrv léspagnol biensir, mé galman in lang i apèl “aymara” épi in n’ot i apèl “quechua”.

Alor, kosa zot i anpans de sa ? Avèk fransé, épi kréol, ni gingn pa fé sa issi nou ? Ni gingn pa di konm banna, apré an avoir ranport la viktoir : Yo si puedo ! Moin osi mi gingn !

Justin