La pa promyé foi mi antan parl métode-la. Néna dé zané é dé zané mi antan parl sa mi rapèl mèm néna kékzané inn-de spéssyalist kubin la vnu la Rényon.Sak la ral amwin avèk métode-la sé la kopérassion internassyonal péi d’ fidel Castro avèk bande péi lo sud. Mi doi dir azot, an sogré, mi éspèr touzour métode-la i ariv la Rényon é i ariv a fé rokil lilétrism. Mi koné pa zot, mé mwin mi souète touzour sak lé bien pou mon péi épi mon bande konpatriyote. In pti zafèr anpliss mi doi dir azot mi souète la viktoir kont l’ilétrism dann dë lang : la lang nou la fé-lang kréol La Rényon-épi la lang nou la anprété, la lang bande franssé .konm koi lo bilinguism i fé touzour parti mon soué pou mon péi.

Astèr mi vé fé in sinp romark sou la form dë késtyon : pou kossa la Rényon in péi toute demoune néna lo droi alé lékol, é bande zotorité i invèsti pa mal dann linstrikssyon néna touzour san é kèk mil zilétré ? Pou kossa toute bande métode la lite konte lilétrism la foiré kaziman ? Alon rante in pé dann bande parolan or mwin la antande dann la konféranss :

- Konm in parol dsu bande zanalfabète.Inn éspéssyalist kubinn la di sa la pa in moune i koné pa arien. Sa sé in moune i fé parti la shène transmission d’in konéssans plizyèr foi santénère é mèm milénèr.Sak i manke sé gingn lir épi gingn ékrir.

- In n’ote parol i di konmsa in lanalfabète i koné pa lir, i koné pa ékrir mé li koné konté é sé pou sa inn lète-suivan son frékanss i tiliz ali, lé roprézanté par in shif sansa par in nonb.Si tèlman ké lo poin d’dépar sé in fraz, i pèrmète izol in mo, é lo mo i mète an valèr in lètre é la lètre i rossoi in shif-sansa in nonb- é sa sé son lidantité nimérik ki pèrmète anou rotourn ziska la lète, épi lo mo, épi la fraz.

- Mwin la antande ossi bande éspéssyalist i komanss par étidyé la réalité-lo térin kiltirèl, sossyal, linguistik é lo tavaye lé fé par bande amontrèr é pou la Rényon bande amontrèr an kréol épi an franssé i viv épi i travaye dsi lo térin rényoné.

Momandoné i fé in spèss kor d’konéssans in baz pou alé pli loin dann la konéssanss la léktir épi l’ékritir avèk in moune inportan i pé apèl sa in fassilitatèr lokal é sé li k’i amenn in groupe dann shomin la konéssanss lir époi ékrir.

Mwin la antande ossi pou métode la i fo kaziman in lakor zénéral, in l’antante rante lo bande zaktèr. In lakor rante l’éta, la kominoté pou dézilétré, la volonté pou an sortir, lankadroman.Yo si puédo, mwin la di sa sé « Mwin ossi mi gingn » mé la pa sa, sré plito « Mwin, oui mi gingn » konm in shomin, in pé long, in pé difissil, mé avèk in rézilta o boute shomin si mi fé lo l’éfor k’i fo.

Kossa mwin la antande épimwin la konprande é mi pé dir azot ? Métode-la in vanté l’ané 2001la ansèrv déza dann trante péi épi la mobiliz in popilassion di milyon demoune par-la é i kontinyé son marsh an avan dousman-dousman mé sirman.I aplike sa galman bande demoune i ansèrv lo braye épi galman demoune néna in sèrtin andikap... Mi rodi ankor in kou sa la pa in sèl métode, mé shak landroi, shak réalité d’térin néna son métode é sé bande ressours lo péi k’i konstrui la métode avèk bande prinssip lométode zénéral

A bon antandèr,salu !