Sa in zistoir lékol ! In marmay té i apèl Zinzanm té i oi in léspès shien gonflé dann son bann touf plime. Alor, li té i di an li-mèm, alon taye lo bann plime pou oir sak i rèst konm shien. In sizo va fé l’afèr ! Ala k’li tay, k’li tay é k’li rotaye. Rézilta ? In bon pé plime in koté, in spèss ti bébète mèg l’ot koté. Dizon, mèm pa in lapin i sort la shine dann konzolatèr éskor...

Pou kossa, mi di sa ? Akoz, i tard pa nora in bann gran-gran konpétission, épi kan nou va oir sa, nou lé riskab di dan nout kèr : “Kèl sé lo vré fors bann zatlète-la ? Kèl sé la fors an plis dopaz i donn azot ?"... Alor, traka pou nou, akoz ni gingn arpa trouv in solission pou nout problèm. Tousa lé anmayé inn dan l’ot : la fors natirèl avèk la fors artifisièl.

Nou va mazine Zinzanm : marmay-la la rézoud son problèm ! Solman, la siènn té fasil pou trouv in solission. Tandis ké la n’ot, pétète la poin solission ! Kan in z’atlète va done lo grin a mor, nou va di : "La pa li ki done lo grin, sé l’ot !". Soman, nout problèm va rèss lo mèm : kèl par pou li, kèl par pou l’ot ? Justin, arète in kou, mon fra ! Out tète va pété !

Justin