Sa in bon kozman. Mé kosa li vé dir ozis ? Mi pans i done anou lo konsèy : la pa bézoin okip nout voizin, sansa demoun ni koné. Okipé ? Sé mèl aou dé shoz k’i rogard pa ou. I vé pa dir si out voizin la bézoin kou d’min i fo pa donn ali kou d’min. I vé pa dir, i fo dévir lo do avèk la solidarité, I vé pa dir non pli si in moun lé dann danzé la pa bézoin ède ali sort dann son l’anbara. Pars moin la romarké, asé souvan, désèrtin moun i kashyète z’ot mank solidarité déyèr lo kozman an-o la mé si ou i ékout azot bien zot i koné tout z’afèr i konsèrn in moun. La di – la fé, sa in n’afèr zot i yèm. Arzout èk sa bann z’afèr souvan dé foi lé pa bon pou savoir, lé pa bon pou fané. In zour si mi antann in moun i di li vé fé z’ami avèk demoune, mé li vé pa ladi-lafé, moin lé pou dira li : dizon li la fine gingn lo match avann avoir zoué… sof si sé in vré l’amityé, mé sa lé rar final de kont. Alé ! Dsi so bon kozman, ni artrouv pli d’van !