Mi koné pa si zot i koné kossa i lé in z’apèl ? Bon, mi di pou sak i koné pa....Kan bann marmay lontan téi sar poz la kol pou trap zoizo, dabor inn zot téi poz z’ot baton la kol déssi in pti pié d’boi épi sak lé vréman ékipé, li amène in kaj avèk zoizo dédan. kisoi inn-dé bèk roz, kisoi inn-dé pti-kok, kisoi in pèr srin. Lo zoizo, li shant, li fé bann ti-brui, pétète ossi li kri o s’kour. Alors kan son bann dalon i antann sa, zot i vien, zot i vol-vol in pé dan lé z’alantour, apré zot i poz, souvan défoi déssi lo batonn’kol é voila zot lé pri, pa dan la kol jak mé dan la kol fort.
Sa i fé pans amoin méssié Jégo. Li di anou, i fo profite bann produi "marque distributeur". Pou li, sa lé fé pou bann moun i mank lo pourkoi, sa sé konm in zèst lo gran magazin i fé pou nou.A bon ? Ou i kroi sa méssié lo minist, ou i kroi sansa ou i rod fé kroir anou ? É ! la pa ékri kouyon déssi nout fron Nou ossi, nout tète i travay ! Nou ossi ni kalkil sak i ansèrv so bann marshandiz-la. Alor, ni di : pétète sa lé fine in pé vié épi avan k’i gate i bèss in pé lo pri. Ni di ossi, pétète sa in fabrikasion manké, sé pou sa mèm i fé in pri pou nou. Pli sir, ni di sa in manièr pou fé rant anou dann magazin, pou ashté so bann marshandiz-la épi fé kol anou par bann marshandiz pli shèr, dé foi ou la poin litilité, mé bann komèrsan la parti gran lékol, zot i koné koman anbruy nout léspri.
Méssié Jégo, i koné sa ossi li ! Li sé in boug instruyé ! Ou bien li kroi, bann komèrs va ansèrv z’ot tik-tak pou fé plézir gouvèrnman. Alé oir, lo komèrsan, i rod sirtou fé plézir son kont la bank, son koffor, son profi. Ala sak li rod : la pa marké non pli kouyon déssi son fron. Déssi sèt lo minist galman. Alor, so papié la signé-la, kossa li ansèrv ? Li ansèrv pou pènn anou, pou roul anou dan la farine, pou fé konfonn anou otour avèk alantour, po d’shanm pou pla kouvèr, makaroni pou la bouji étsétéra, la ké lo ra.
Méssié l’minist, ou ossi ou di banna poz z’apèl pou fé trap anou. La pa zist, la pa in n’afèr rant moun konm k’i fo. Fransh vérité !