Matant Zélida la ékrir Justin :
Mon shèr nové, mon spès salté,
Moin pèrsonèlman, mi oi pa pou kosa parti bann rouj-de-fon i may èk sak i fé Sint-Sizane. Dabor inn, pars na troi list i di zot lé dann parti kominis, donk i sifi lès lo batay fini, apré sak la ginyé, mèt ali dann in gran fotèy épi lé dé zot i asiz dsi ti-ban. Anplis ké sa, komine Sint-Sizane, si mi tronp pa, sa lé pti, kosa i gingn fé la-dan ? In biznès... i fo alé in n’ot koté. Moun rish ? Mi pans lé rar konm korn lapin. Arzout èk sa, li lé kosté sanm Sint-Mari, in komine la droite, épi Sin-Dni, in gran l’androi bann kominis na poin z’amiz. An plis ké sa, koméla, i pas pi la-ba, i kontourn sa. L’èr-la, étonn pa zot si zot l’apré amènn in konba initil. Zot i anparl bann prinsip… mé prinsip-la, i sar pa bazar èk sa ! Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi pans ou l’apré konfonn otour avèk alantour, vi pran po d’shanm pou pla kouvèr, pars si na troi kandida i di zot lé kominis, na arienk ènn na réspé pou Parti kominis, é lo parti i réspèkt ali, sé pou sa la shoizi ali. Arzout èk sa, tourn lo do èk lo moun lété viktime in gran l’inzistis... sa i fé pa ! Tourn lo do èk Maurice, sé konm si i tourn lo do avèk Paul Vergès, Pierre Vergès, Elie Hoarau, viktime la zistis inzist. Banna la rézisté, Maurice la rézisté osi. Nout parti, sé in parti la rézistans. Ala pou kosa li vanj avèk Maurice Gironcel. La pa in n’afèr d’gran fotèy, la pa in n’afèr d’ti-ban, sé in n’afèr d’rézistans, é avèk sa i zoué pa !
An pliské sa, Sint-Sizane, sé in baz dann dévlopman dirab. Si Maurice i gingn, Sint-Sizane v’alé plis a fon dann dévlopman dirab. Sansa, malèr pou la komine, pars va démont bout par bout lo dévlopman dirab, pars, san manké, lo shèf démolisèr Didier Robert va mèt son kiyèr sal dann marmit i kui pa pou li ; èk sak li la fine kasé, i zènn ar pa li arkas sak Lucet épi Maurice la fine fé, anbar la rout pou sak la komine i vé fé... In dèrnyé mo matant, in komine sa la pa in post mèr pou nou, sé in baz pou rézist kont lo kolonyalism. Ala sak in pé lé dir pou konprann !

Justin