Mi èm azot. Sak i travay dir, shomèr, sak i mèt soulié verni, ou sinonsa sak i anfil savat gouni, bann plantèr, z’ouvrié, sak nana, sak lé oki, mèm si i di : « boug oki na pwin d’frékantasyon » é pi lokisité la pa in vis. Mi èm l’antropriz, sindikat, travayèr osi mi èm. Sak i port linèt, sak nana lo dan, sak la pwin. Zistoman pou lo dan, mi koné in madanm navé pi lo dan dan sou boush ou plito té rèt a li inn, bana té i di, i rèt madanm la in dan pou bwar kafé. Koseman la lé krièl. Fransh vérité, té pa pou méprizé té zis pou kas lé kui, pou fé ri lo boush. Zistoman. Banna la tonm si paleto lo prézidan ek koseman lo dan. Li lé pri dan la kol jak soso ek sa. Li sobat, li esplik, li lé mayé, pétèt li osi, li la di sa pou fé ri. Zot la konpri mi èm domoun Mé mwin nana in fèb pou mon bann, inn ti panshan pou ti kolon, in proférans dizon pou maléré. Lo prézidan i di : « fo pa oublié ou ti sort, sé la mèm ti tyin ton rasin ton rézon de vi ». Mi di konm sa osi mwin. A zot ?

In ot boug osi lé dan la kol jak an frans. In minis. In minis dé nout répiblik konm i di, li la oubli déklar son z’inpo. Dopi trwazan, katran mèm li pèy pa z’inpo, li la oubli pèy son loyé, son bann z’amand osi, tousala i fé bokou, sé in boug si zot i vé, sé konm la shanson « zé la mémwar ki flansh » mé ryink pou z’afèr larzan é soleman pou langé. Mwin mi kroi si son mémwar lé fay vodrémié li lé pi minis. Ala in boug i fé la lwa, li respèk pa, li fé l’ogmantasyon z’inpo pou nou é li li pèy pa, li na toupé foutor. Sé pa promié fwa i ariv sa, rapèl a zot in ot minis té parèy mi di pa lo non, té i di pa nou tout, la ral a nou kari sou dri ziska tan la bat a li déor osi. Isi osi, pétèt nana lamadou. Mi sort lir dann in zournal in boug sora oblizé démisioné avan d’komansé. Son bann dalon la tay in kostim pou li é banna i di, sirmézir, ryink pou li. Soleman li i gyin rant dodan. Mé la pa tienbo dobout, konm i di, la déshiré an rout, zot i vyin romarké ké lo kostim lé tro gran pou li, lo mansh droit i dépas é lo mansh gosh lé tro court é dikou pétèt i trouv pi domoun pou pèyé. Mézami. Tout fason, konm di l’istwar : In méday na touzour son rovèr.

Nana i di nout répiblik lé abimé, ki pé pi kontinié komsa, ké nou lé o bou ek tousala z’afèr. Tou lé zour ni antann, nou lé finn prèsk abitié, banna i coup, i ash, i transh tansantan i domand a nou, nout lavi, mé i tienbo pa kont. Mèm dé foi ni fé dé proposisyion osi, Z’afèr i tienbo dobou, z’afèr sérié pa konm z’afèr kostim, pou avans dovan, pou nou èt aktèr, pou mèt nout péi an l’èr. Zot i fé zorèy koshon dann marmit pwa.