Oté

« Zafèr kabri, la pa zafèr mouton »

In kozman pou la rout

Justin / 10 out 2020

JPEG - 43.6 ko

Médam zé Mésyé, la Sosyété, koz èk moin sé koz èk in kouyon ; mé sé o pyé d’lo mir k’i oi lo bon mason. Mézami, zot i koné, dann tout lang, dann tout péi, néna in kozman konmsa. Kosa sa i vé dir par l’fète ? Sinploman, i vé dir shakinn i okip sak i rogard ali, épi li lèss lé zot okip zot prop zafèr. Poitan, la lang i yèm bate, zot i koné-mèm dé foi li bate a tor é an travèr. Mi souvien Esope lo zésklav fabilist téi di : « La lang sé lo mèyèr é lo pli pir dé shoz. » Dann sé kondisyon, figir azot lo danjé in pé i mète azot dédan kan zot l’apré okip lé zafèr dé zot. Moin pèrsonèl, mi yèmré ziska pèrd la parol plito k’okip dé shoz i rogard pa moin. Mé, i ariv amoin, konm i ariv a d’ot, mète kiyèr sal dann manzé i kui pa pou nou. La déza ariv amoin sa, é mi pé dir azot la pa arienk in foi moin la rogrété - mèm moin la mord mon doi. Anval in mo sé gard in zami, di in mo sé tazantan pèrd in zami. Alor, mi kite azot rofléshi la dsi é ni artrouv pli d’van. Sipétadyé.