Zot i koné néna bonpé kozman i di a popré lo mèm z’afèr. I di konmsa shakin I doi okip son n’afèr é pa sète lé z’ot. Mi souvien in zour dann in rényon moin la di in madam mi koz ni pou li, ni avèk li é in kamarad té pa loin la di in proverb rényoné mi yèm bien pars li di konmsa : ”Kan I koz avèk boukané sosis I rèss pandiyé”. Sa I bote amoin bien ! Pou kosa ? Pars kan ou I koz avèk in moun son bann manèv I vé asiz dsi ou. Partou néna bann fayo konm téi di dann l’armé, alors lo fayo li sava défann son mète alé oir la pa dmann ali arien. Dann in ka konmsa I fo di lo fayo : ”Travèrs aou !”. Mi kite azot rofléshi la dsi é ni artrouv pli d’van. Sipétadyé !