Médame, zé Méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo vré masson.

Mézami demoune i yème pa k’i boure lo né dann zot zafère. Konbien foi wi antande san vouloir demoune apré arprosh in n’ote épi apré di : « Mète pa oute kiyèr sal dann marmite i kui pa pou ou ! ». I vé dire sinploman, sa i rogarde pa ou… Romarke sré bien ké lo moune k’i di sa, li ossi li évite mèle dann zafère lé zot-pars la pa touzour konmsa. Mélé, shamélé, sa in pratike demoune issi La Rénion ; kolporte la nouvèl sa demoune i yème bien galman. Mwin mi trouv sa i poze pliss problème k’i rézoude é sé pou sa mi méfyé lo kolportaz é mi ankouraze pa d’moune pou raporté.

Alé ! Mi kite azot rofléshi la dsi é ni artrouv pli d’ van. Sipétadyé.