Kosa sa i vé dir ozis ? Sa i vé dir sinz-solon lo zonm - i oi pli mové koté son kamarad. Sirtou kan li grinp déyèr in n’ot dsi pyé koko. I di pa osi, oplis in sinz i grinp an-o, oplis i oi son déyèr. Ni pé dir in promyé z’afèr la dsi : dabor inn, désèrtin moun i oi touzour shé lé zot lo pli move koté. I rovien a dir zot lé bon pou rogard lo négatif, é zot lé pa doué pou l’pozitif. Par l’fète, par ousa nou kréol nou la gingn défo-la ? I paré la-ba dann l’Amérik banna i rogard lo pozitif avan, é lo négatrif apré. Dann l’érop lé shoz i ariv sans kontrèr. La pa pou arien si sé bann z’éropéin la koloniz anou. Tankamoin, moin na In bon loson pou rotonir, sé d’rogard dabor lo bon koté, lo mové koté va vnir apré. Ni pé dir sé konmsa nou v’ alé an avan dan la vi é nou va lès shakinn son shans san kas ali par avans... In n’afèr moin la romarké souvan-défoi bann zanimo i komans par santi z’ot fès pou oir si zot i rokoné z’ot kamarad : sa i vé dir ké sa la pa lo pli mové koté ké z’ot i rode, pa lo pli vilin défo. Alé ! Mi lès azot kass z’ot tète la-dsi é ni rotrouv pli d’van sipétadyé !