Mi koné in provèrb i anparl bourik é li di konmsa : « Atèl in milor avèk in kalèsh, ala ké li pran ali pou in shoval. ». Fyèrté mal plassé ! Konplèks linfèryorité ! Bourik i oi li konm in zanimo arivé vi ké li pran ali osinonsa son zanfan pou in shoval.

Ni parl bourik, ni parl shoval, mé boudikont sé l’om lé an késtyon : konplékssé, li pran ali pou sak li lé pa — pou sak solon li lé sipèryèr avèk li… Mwin la konète rényonèz an Franss téi di zot lé malgash, sansa zot lé morissien. Mi panss pa in malgashine noré di èl lé rényonèz, ni in morisyène. Néna ossi sak i di pli for ké lé z’ote ké zot lé franssé. Rényoné-rényonèz ! Sa i fé pa pèrde anou lo droi mète shapo. Alor, alon di ki ni lé, franshman, klèrman, san onte.

Alé ! Mi kite azot rofléshi la dsu é ni artrouv pli d’van. Sipétadyé.

Justin