Si néna in kozman mi yèm pa sé sète-la. Pou kosa ? Pa si tèlman akoz i parl zanfan, ni tét, ni d’pléré. Mi konpran bien zanfan i doi done in signal son momon pou dir aèl li la fain. Sa lé dann la natir mé lo koté ké mi yèm pa sé kan sanm pou moin i parl bann gran pèrsone, bann zadilt si zot i vé. Sré konm k‘i diré in l’invitasyon pou fé pityé pou gingn son soso. Pa in réklamasyon konm k’i fo, dsi out bon droi mé kon mi di in domann siouplé avèk in gro pléré a la klé. Moin mi profèr d’moun i défann z’ot droi : moin na droi travaye ébin mi vien réklam mon boulo. Moin na lo droi in lozman bin mi vien réklam ali. Mon péi néna lo droi in bon dévlpman, bin ala sak mi vien réklamé. Alé ! Mi kite azot pou rofléshi la dsi é ni artouv pli d’van sipétadyé.