Ofiramézir èl téi koz ébin mwin téi kroi. In moune si zantiye, avèk in si zoli voi, si tèlman bien abiyé, lé pa possib sa i di pa la vérité. Opliss èl téi koz, opliss mwin téi kroi. Mwin téi kroi mon zanfan n’arté bien laba dann in péi i apèl La Franss, avèk kaziman in konjé tou lé zan épi in promèss in zour li va arotourn doktèr. Otroman issi, grossèss, dsi grossèss, mizèr par dsi mizèr, é kaziman arien pou manzé dann i boukan san nom. Mi sign, bien sir mi sign… Mi mète mon pouss tranpé dann lanke, lavnir mon zanfan lé assiré laba, dan La Kreuze épi si ni oi pa nou va ékrir. Li va ékrir é va bien trouv in moune pou lir.

Promess sé proméss é sa i angaj solman sak i kroi.

Amene pa riyin. Bato Nordvaer i atann dan la bé. Amène soman zot kof an boi pars landroi zot i sava dizon lé konm issi dann Chagoss. Néna toute : la kaz, zardin, travaye épi la mess kan i ariv dimansh épi séga tanbour lo samdi soir. Issi la guèr i sava pété, issi biento laviyon i sava bonbardé épi zot na mèm pi lo shien pou protèz azot - lo shien lé fine toufé antéré, osinonsa brilé. Landroi i sava lé myé k’issi sa lé sir. Zanfan Chagos sar bien ; La Réne la promi, la Réne sa i réspèk son promèss, sa i protèz son bann sizé. Fé konfyanss zot nora poin pou rogrété.

Promess sé promèss é sa i angaj arienk sak i kroi…

Néna in moune té apré rogarde lo pti livré i sorte parète épi téi domann si zanfan Chagoss té pliss sansa moinss maléré ké zanfan La Kreuz, mwin mi panss zot lété, zot toute, dann shomin malizé.

A bon antandèr salu !

Justin