In déportassion avèk zoli-zoli promèss, pou arvni an vakans shak ané. Pou pa pèrde zot famiye de vu. Zoli promèss pou aprande in bon métyé é konstrui in gayar l’avnir pou zot..ède zot famiy résté La Rényon, aprann lo métyé doktère… Promèss mantèr pars zéro voiyaz retour, zéro vakans, zéro kontak avèk la famiye. Anpliss la vol azot ziska zot nom d’néssans, la éparpiye bande fratri, kanta la promossion, i fo pa rakonte anou zistoir, la pa dann gratin la sossyété zot la artrouv azot.

Mézami fransh vérité, sa sé in tash dann listoir noute péi mèm si nou lé pou arien. In tash pars nou la pa gingn fé arien pou amontr noute solidarité par raporte noute bande konpatriyote... Opliss mi oi sak bande shagossien i fé pou défande zot droi, opliss mi di, dann mon kèr, bande rényoné noré pu fé pliss é pétète la pa tro tar ankor.

Avan fini mon modékri, mi vé anparl azot in madame élégan vèye pa koman, avèk in gran dignité, viktime la déportassion é k’téi di konmsa dann télé kan èl i fé rotour dsi son vi brizé. El téi di :

La pa larzan mi rode sé sinploman zéskize lo gouvèrnman La franss… Pars mèm sa zot la pa gagné é la pa tro tar pou réklamé.