Mézami, mi yème bien bande kozman konmsa pars défoi lé vré, défoi lé mantèr. Lo rézon lé sinpe : sé pars la pédagoji konm lédikassion la pa in syanss égzak, épi lédikassion wi gingn sa avèk oute paran, sa lé sir, mé wi gingn sa galman avèk lantouraz. Armète ankor la dsi oute prop léspèryanss la vi. Aprésa ni konpran bien sinplifyé par dsi sinplifyé lé shoze wi fini par pass koté la vérité.

Antouléka, demoune souvan dé foi i panss mèm manyèr lo kozman mwin la marke an-o la. Sé lo paran k’i fé lédikassyon son zanfan é li fé sak li vé avèk lo zanfan, li fassone sa konm li vé, li déside koman lanfan sar pli tar inn foi li sar gran.

Alé ! Mi di azot toussala mé mi koné zot ossi zot néna zot prop zidé la dsi, alor mi lèss azot rofléhi an panssan mon pti kozman i pé z’ète azot in pé itil. Ni artrouv pli d’van. Sipétadyé.

Justin