Lavé inn foi, in pti famiy : lo papa, lo momon épi in zanfan solman, uitan par-la. In zoli zanfan mé li la gingn in drol maladi. In maladi orfeline d’apré sak i di. Bann médsin i rod in manièr pou guéri lo zanfan épi i gingn pa avèk bann métod normal, vaccin, médikaman, sérome, étsétéra.
Poitan, nana in manièr pou soign la maladi lo marmay lavé. In grèf avèk bann sélil soush, i tir dann kordon in nouvo zanfan an bone santé in frèr sansa in sèr lo zanfan malad... Mé in pé i di konmsa, sa in n’afèr i fé pa : in zanfan, i pé pa ète in médikaman.
Dann déssèrtin péi, la loi i donn lotorizassion, i fé pa tro lanbara. Dan la Frans, i rode in pé plis lo bout : i vé oir si lo moun i fé in zanfan akoz li vé in zanfan, mi vé dir li vé vréman. Koman-koman banna la gingn lotorizassion. Médsin la bien véyé é lo zanfan lé éné san maladi.
Astèr, avèk bann sélil dann kordon zonbri, va fé in grèf pou tir lo marmay malad dann dézagréman.
Si ni kalkil bien, ni pé kroir famiy-la va ème bien z’ot dé zanfan : inn pars li té bien malad épi la fé tout é mèm plis pou guéri ali ; l’ot akoz sé par li son gran frèr lé riskab artrouv son santé ; épi lamour rant lé d zanfan sar galman in santiman solid.
Alor, anon pa di zanfan médikaman, alon di zanfan lamour,in lamour for, in lamour vré.

Justin