Médam zé méssyé, la sossyété, koz èk mwin sé koz avèk in kouyon, mé sé o pyé d’lo mir k’i oi lo masson.

Mézami, si zot i lir lo dë vérité mwin la marke an-o la, mwin lé sirésèrtin zot va dir amwin la pa bézoin kass lo kate pate in kanar pou konprande in n’afèr konmsa é pou admète sa lé dann la natir dé shoz. Sa lé vré fransh vérité pars mwin la zamé antande dir in pti poisson i koné pa nazé épi in pti zoizo i koné pa volé.Si in zour sa i ariv, a toulékou sé pars néna in gran mitassion dan la natir mé pou l’instan mwin lé sir sak mi di lé vré é sar vré galman dan lo fitir.

Mé la pa sa ! Si mi poz azot la késtyon sé pou savoir si sa lé natirèl osinonsa kiltirèl. Si mi di azot zanfan demoune i koz ? Natirèl sansa kiltirèl. Mwin lé sirésèrtin so kou issi lé kiltirèl san pour san. Alor kossa k’lé natirèl dan nou é kossa k’lé kiltirèl ? Zot i konpran so kou issi i fo fé travaye la tète.

Sé pou sa, mon késtyon pozé, mi kité azot rofléshi la dsi é ni rotrouv pli d’van, sipétadyé