Antouléka la késtyon lé pozé, èl lé la, é la poin répons konm ki fo pou l’instan. La mèm poin lo komansman di komansman d’in répons é sa sé in n’afèr lé pliské insiportab pou la plipar rantre nou.
La mizère – mèm la mizèr noir – mwin la konu dann mon lantouraz kan mwin lété marmaye. Mwin la vi marmaye vant vide apré tonb san konéssans dsu ban l’égliz. Mwin la konète la solidarité ossi sète mon papa épi sète mon momon épi band kamarade kan zot téi anvoye in tante manzé par issi, in tante manzé par laba in lite dolé kék shoz pou kal lo bouzaron marmaye lo vante gonflé avèk lo vèr.

Mé kan la Rényon la gingn départman franssé, mwin la pans sa lété fini, é toute marmaye nora gingn alé lékol vant plin é malorozman zordi lé pa vré : la moityé bande marmaye lé pov dann bande famiye pov.. Dann la sétyèm puissans mondyal, an plin 21e syèkl.

Lé pa possib lèss in n’afèr konmsa é kan in kandida i domand san atande plis k’i fo, 150 euros par famiye épi par moi an atandan i fé vréman in plan d’lute kont la mizèr, li néna plisské rézon… Sansa zanfan pov – mizèr souvan dé foi – va vni rényoné pov épi zot nora zot tour zanfan pov. Sa la pa in déstin sa ! La pa sa ni vé pou noute péi. La pa pou sa noute bande zansien la propoz la loi 1946. La pa pou sa ni vanj pou noute péi.

Mézami si ni fézé, noute toute in gran kanpagn kont la mizèr san tardé ? Pa pou fé la sharité, mé pou réklamé. Zot i pans pa ni dovré é ni pouré sanb pou mwin.
A bon ékoutèr, salu !

Justin