Mé kan ni bate la lang dsï bande moune atèr, dann noute sossyété, ala in n’afèr k’i bote pa mwin ditou. Mi sorte antande dann in lankète néna pliss san mil pèrsone lé mizèr issi dan noute péi — é mi rapèl kant mèm néna pliss la moityé marmaye pov k’i viv dann bande famiy pov. Mi pé di galman La Rényon i fé parti d’La franss, inn an parmi bann péi lo pli rish néna dsï noute planète.

Alor oila kékshoz mwin la antande yèr é mi domande amwin koman ni pé ansort anou dann in n’afèr konmsa — mi di nou mé sré myé ké mi di bande famiy rényonèz… Donk mwin la antande sosiss kat-sink éro la pa sossiss. In bon sossis sé 9-10 éro lo kilo, janbon néna in kantité nitrite dodan é nitrite lé pa bon pou la santé. Si i rogarde bien dann la nouritir transformé va lir néna bonpé konsèrvatèr dodan — sak i komanss par E — é toulmoune i koné an kantité sé kékshoz lé pa bon ditou pou la santé é pandann tan-la lo pri i arète pa grinpé.

Astèr mi di an mwin-mèm, marmaye lékol lé an vakans pou in moi ankor, é sé bande famiye lé drolman an difikilté. Mi koné zordi bande famiy pov na kaziman prèss pi larzan pou viv é i fo zot i atande ankor dë-troi somenn avan gingn lo pourkoi… Alor koman bande momon i sava fé pou nouri zot zanfan ? Alé bate ankor in foi dsï la porte bande surplu éropéin ? Pou gagn kossa : la kalité osinonsa la kantité ? Kongn dsï la porte lo CCAS ? Pou fé in dossyé.

Mi souvien dann la kanpagn député, néna in kandida la di i fo arpran lo vèrsman larzan Cospar mé so kou issi avèk 150 euros minimome par famiye é par moi, mé pèrsone la pa suiv ali. Mwin pou mon par, mi ropran in rovandikassion noute parti l’avé dann tan : fé marsh la kantine dann vakans. Irzan ! Sèl moiyin pou nouri bande zanfan pandan la pèryode vakans é sèl moiyin pou évite bande dézékilib alimantèr shé zot.

In péi i okipe pa son zanfan konm k’i fo nora in lavnir ki déshante — a bon ékoutèr, salu.

Justin