Zarboutan ? Sa in gro piès doboi, i mète an bié dann sharpant in kaz. Sé par son bann zarboutan k’in kaz i tienbo dbout : poto tousèl i sifi pa.
La Rézion Rénion la désid donn shak ané in rékonpans pou bann moun i mète nout kiltir anlèr, i ardrès lo kaz kan la fine fléché, grandi ali, bien, aranz ali. Konmsa i pèrmète nout kiltir kontinié égzisté, alé pli anlèr, vant ali in pé.
Bann tizanèz la fine gingn so titr-la, bann maloyèr la fine gagné galman, domin sora lo tour bann rakontèr zistoir, bann moun la vanzé pou la lang, bann zékrivin, bann shantèr, bann zartist.
Nout tout nana déssèrtin nom dan la tèt. Solman pétète, nou la fine obli koman banna la débate souvan dé foi zot tousèl, san rod pou gingn in nafèr, sof lo mépri bann moun san foi pli kouyon k’zot. Sak té i mète anlèr "la culture" akoz sa i fé pli noble, pli blan, plis oropéin épi i gougnard nout kiltir akoz sa i fé pli noir, pli mizèr , pli indien, pli afrikin, pli yab.
Alors, lo zarboutan lé vréman zarboutan nout kiltir, épi, mi pans, la ossi, ni pé ansèrv modèl pou in bon pé péi konm nou, dan l’androi ni viv - l’oséan Indien - épi dann d’ot z’androi galman. Fransh vérité !
Justin