Kan ou na in zépine dann pyé, lé normal ou i ésèy tiré, pars a fors marsh déssi lé riskab tro anfonsé, pétète mèm abouti. Poitan, mi antan pa dir, méssyé Sarkozy i sava domann son minis Travay pou démissyoné, alé oir méssyé Woerth, sé in vré zépine dann pyé gouvèrnman fransé. Lo prézidan i di li la tro bézoin so bononm-la. In répons k’i vo sak li vo, donk pa gran shoz !
Pou kossa la zistis, i tourn tou otour lo madam Bettancourt konm guèpe, mé ziska zordi san piké. Moin lé sir si in pé lété son plas, sa i fé lontan noré fine mète banna in kalpyé é anvoy sa tribinal. Pars sé in vyé madam ? Non, bann ziz i argarde pa tro sa, i anbarass pa zot avèk so késtyonn laz. Donk in répons konm in n’ote, k’i vo sak li vo donk pa gran shoz.
L’èr-la mi pans, méssyé Woerth lé ziska zordi trézoryé l’UMP, madam Bettancourt i donn larzan bann parti la droite, l’UMP an parmi, l’UMP la pèy la kanpagn zéléksyon méssyé Sarkozy. Moin lé pèrdi dann so l’amayaz. Mi koné ossi lo zo i soutyin la shèr, mé ki k’sé la shèr ? Ki k’sé lo zo ? L’èr-la, mi kalkil in shanté bann ti fiy dann la kour lékol. In shanté i vo sak li vo é pétète i pé donn la klé lo mistèr. In shanson té k’i di konmsa : “Zé té tyin, ti mé tyin par la barbishète...”.

Justin