Lé vré, koméla nana nouvo zafèr, tou l’tan issi La Rénion. Lé vré galman bann zournal i anparl, bann télé i anparl. Soman, moin na konm linprésion sa lé malizé rant dan la tète demoun. Lé difisil pou dmoun mazine koman tousala lé inportan dann nout prézan, épi dann nout lavnir. Sirtou kan bann vié z’idé lé la, paré pou pass in kal bann zidé nèv.

Kissa l’otèr ? Mi koné pa. Sak moin lé sir sé k’déssèrtin i vé pa partazé. Sak moin lé sir sé k’lékol lé bien ariéré dsi bann késtion-la. Mi domann amoin si bann gran shèf blan i fé la loi la-dan, la pa kontan ral anou an aryèr plito k’pous anou an avan. Biensir, toulmoun la pa parèy, épi dann panié, la pa tout zèf lé gaté : in bon pé lé bien bon, lé bien fré, i pé mèm mète a kouvé, pou donn zoli-zoli pti pipité.

I sort fé in grénèl lanvironnman : li vo sak li vo, mé déssèrtin la sèy fé avans bon-bon zidé. Éstèr, i rèss pou kontinié bann kanpagn dsi tout sak i fé pou aranz nout prézan, épi prépar lavnir, amontr sa tout bann zénérasion : marmay-li, jèn-li biensir, mé pa solman : tou l’moun i doi rant dann ron. Si nout ti péi i vé donn légzanp, mi kroi i fo fé sa.
Épi bann zèf gaté, tir ali dann panié !

Justin