Lo ralé poussé l’ariv Sint-Roz, la violans kont in moun dann l’opozision, i ramèn anou an aryèr. I détèr dann nout mazinasion, lo tan la frod éléktoral. Provik lo préfé té dakor avèk ou, épi ou té dann bon parti, pa lo rouz, l’ot, ou lavé lo droi rodrès lo sifraz inivèrsèl. Ou lavé lo droi déklar sak la pèrd, la gagné. Si nana lé pa kontan, la violans, maron sansa ofisièl, va fé rès azot trankil. La prizon té pa pou lo frodèr, té pou son viktime.
Kan la frod l’arété, la pa fé sré t’i konm dan lafrik di sid in komisyon" vérité et conciliation". Lé bien rogrétab, akoz bann moun la fé sa, sak lé ankor vivan, lé bien trankil dann zot koin épi lo bann viktime, nana in boul i romont dann zot gorz kan zot i mazine kalité mové tour la fé azot. Bou-di-kont, sé zot, lo viktime, ki pans zot lé koupab : zot la pa gingn défann fé in n’afèr konmsa. Lé bien rogrétab ankor, akoz la pa tir dan la tèt bann moun, in pé tout zénérasyon so lidé d’frod éléktoral.
Tansion pangar, la brèz lé ankor la sou la sann sho ! Tansyon pa lo tan lontan i arvien : lo tan ou mèt biltin rouz épi i sort biltin blé, lo tan i mèt zèf poul a kouvé, i sort ti-kanar.

Justin