Zèf poul i donn pa pti kanar !

Matant Zélida la ékrir Justin :

Mon shèr nové, mon spès salté, rouj de fon dovan l’éternité, ankor in foi mi oi zot i sava okip dé shoz i konsèrn pa zot. Ala ké zot l’apré anparl la trète bann noir dann La Libye... In fason konm in n’ot pou mète La Frans an akizasyon. Toultan La Frans, zamé lé z’ot sirtou pa sak i fé lo shien avèk z’ot bann frèr : in pasèr i apèl sa. An touléka, sak mi pans, sé kan ou na poinn priz dsi kékshoz, ou i anmèl pa. Kan ou i vien pa pou anpèsh in n’afèr, ou i kraz out banane in poin sé tou. Tout fason sa in kont rant bann moun l’Afrik, é i fo lèss azot règ z’ot kont ansanm é nou lé pa la èk sa. Tok ! Pran sa pou toi.

Justin la fé pou répons :

Mon vyé matant k’i koz toultan la boush rouvèr, sak ou i di, la pa pou étone amoin. Si ni port in pé atansyon, nou pé romark souvan défoi désèrtin i trayi z’ot bann. Matant kan ou i amontr ou, an tan ké klass popilèr, ou la pran l’idéolozi réaksyonèr. Rézilta : ou i trayi out bann natirèl. Kan Figaro la trayi bann révolté SinLé, kan li la dénons azot, li la trayi son bann natirèl.

Zordi bonpé demoun La Rényon i domann bann gouvèrnman pou vanz kont bann marshan zot prop frèr, é ou, ou i oi pa la rézon. Donk ou i an lav la min. Donk ou i trayi ankor out bann, ou i trayi out bann ankor inn foi… Matant na poin arien i ariv par azar dann l’istoir : si ou i di sak ou i di zordi, sa i vé dir, ou i partaz l’idéolozi bann pli réaksyonèr alé oir ou na poin in l’intéré d’fon la dan.

Fransh vérité, la pa in onèr pou ou, konm pou tout sak i fé ménaz avèk l’idéolozi réaksyonèr… Mi souvien dann in sobatkoz l’inivèrsité Françoise Vergès té apré dir i fo ékri l’istoir lo mouvman réaksyonèr isi La Rényon ébin si in moun i ékri so l’istoir la, moin lé sir ou konm d’ot zot va artrouv azot bien la dan, dann lo kouran réaksyonèr.

Zèf poul i donn pa ti kanar. Tok ! Pran sa pou ou !