A s’ki paré, bann Fransé lé fatigué azoute lo trou dann zot sintir é oir d’ote i dépans san pran la pène konté. Lé vré sa ! Larzan lo moi i goumante pa pou bann ti-kolon, la rotrète parl pi, l’avé inn-dé pti prime tazantan, banna la rabote sa san pran pityé. Si tan tèlman ké la France d’an-ba, konm k’i diré, i manz patate avèk la po, é la France an-o i viv dann linsousyans, é lo liks. Pli pir, toute biznèss lé bon pou in pé gonf z’ot pla… si i fo, zot i ariv a mélanz larzan piblik avèk sak lé azot.
Mèm bann minis, i diré i ème, sansa i ankouraz sèt éspor-la, é kroir amoin, i élimine pa zot avan lo uityème final. Sarkozy la déside donn légzanp : li siprime son koktèl katorz zilyète, é li domann bann minis fé zot dépans pèrsonèl avèk zot larzan pèrsonèl épi diminyé lo nonm pèrsone i travay pou zot. A, foutor va, va oir, va oir, va oir sak va oir !
Solman, in bann mové léspri i komans domandé akoz lo bann minis, lo prézidan, épi lo promyé minis i diminyé pa zot salèr... kansréti dis pou san ? Banna i di non ! Arète avèk la démagozi. An dous, dan son do, bann minis i di dann télé, bann désizyon-la lé sinbolik, é la pa sa va ardrèss lo bidzé la France. Bou di kont, i fé sa aryink pou lo brui, pou k’sa i ariv dann zorèy bann Fransé, késtyonn fé prann azot blan pou noir, makaroni pou la bouzi, savon pou fromaz... pars konm di lo kont, sé lo rozoir vide k’i fé bonpé dézord.

Justin