Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
i prétan dir, mèm si bann rouj la fine bien afayir, zot la gingn in dépité éropéin, Younous Omarjee. Mi pans zot la poin pou bate dsi l’éstoma avèk in pti partisipasyon lo zéléktèr é anplis ké sa zot lété troizyèm déyèr la droite épi déryèr parti sosyalis, sak toulmoun i apèl la gosh. Arzout èk sa, zot la avans maské pars moin la pa antandi dir parti kominis téi soutien lo dépité Omarjee. Sak moin lé sir sé ké bann zournalis la bate la lang la-dsi. Mèm ké inn la di, zot parti la fé sak li pouvé pou fé pèrd zot prop kandida... Sa i vé pétète dir ké in foi anplis zot la pèrd. Kan zot i sèy fé élir in moun zot i ariv pi, é kan zot i vé fé bate in moun, zot i gingn mèm pa. L’inpuisans-la, sa in movémaladi sa !..Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
La ou i sort fé in dékouvèrt la ! Ala ké d’apré ou nou la sèy fé bate lo dépité l’inion pou l’outre-mèr. Poitan la pa Sint-Sizane list la fé son méyèr rézilta ! Poitan, dann zournal témoignages la pa pass in zour san k’i parl Younous Omarjee ! Poitan in pé partou bann militan kominis la fé zot travay ! In légzanp : Sintandré… bann kamarad lé distribyé trak. Alor si d’apré ou nou la sèy fé pèrd nout kandida, parl pi alor bann sosyalis é bann l’ump... sak la fé la kanpagn an dorman. Konm di lo kont, in kanpagn, sa i dépann bann kandida, bann parti ki soutien azot, sa i dépann osi la volonté bann zéléktèr. I pé pa an avoir in bon kanpagn si lo troi i rankont pa é lo bann zéléktèr té in pé dépasé par in règloman bien difisil pou konprann, par in n’afèr k’i apèl l’Erop in pé loin par rapor anou... Antansion kant mèm sak la ékout nout dépité li la antann bon zésplikasion é si li téi vé li la gingn bon rézon pou voté... In n’ot afèr mi pans la shagrine azot in pé : sé ké la list l’inion pou l’outre-mèr l’avé lo soutien bann parti l’outre-mèr solman, pa sète in gran parti La frans konm parti sosyalis épi l’ump. Sa lé inportan sa matant pars sa i vé dir si bann l’outre-mèr i vé, zot i pé fèr in l’inion é ranport désèrtènn viktoir. Sa lété vré yèr, lé vré zordi é sar vré domin. La politik l’inion ala in n’afèr i fo anou ! Tok ! Pran sa pou ou !

Justin

NB : Matant ou l’apré parl bann konplikasion la loi, la fète dé mèr, la distans rant bann péi l’outre-mèr. Ou na rézon , mé obli pa in n’afèrmatant, dann foutbal na in patoi i di bien :"balon lé ron pou toulmoun". Sa i vé dirsi na difikilté sé pou toulmoun é sk i fo sé pass par dsi lobstak.Sak i pass i gingn !Sa sé in n’afèr a pa oubliyé !