Dépi si tèlman lontan lo pèp té i gingn pi fé antann son vré voi... Dépi si tèlman lontan bann la droite lavé karsèr la volont popilèr. Toussa, pou kossa ? Pou mète kèl gran projé anlèr ? Près pa arien ! Anplis ké sa, in bann moun listoir i prann’ar mèm pa la pènn rapèl z’ot nom.
Mars 2008, zéléktèr la bate lansien mèr atèr, la rash son kro, la anvoy ali dingué. Donkalor, lo tan lavé arivé pou bien aranz lo kartié, pou fé in komine konm k’i fo bien roganizé, pou mète Saint-Paul dann dévlopman dirab. Lo tan lavé arivé pou fé in vil lo vintéinièm sièkl.
Mé, ala k’tribinal i sort déside anil zéléksion d’mèr. Akoz ? Pars, d’apré sak moin la konpri lo mèr d’avan, par l’fèt Bénard, la pa gingn fé lo zéléksion konm k’i fo, konm in mèr fran, épi avèk in bone kapasité. Solman li lé pa fran é késtionn kapasité. Arvoir kouzin, tak baro !
Li mérite pa Saint Paul, promié karté péi Bourbon avèk tousa bann zarboutan nout kultur
Huguette ! Tienbo la pa largué ! Tienbo la pa lès shapé ! Listoir i pé pa tarz (1) anou ankor !

Justin

(1) Tarzé, sé flat in moun pou roul ali dan la farine.