Dimansh k’i vien néna zéléksyon éropéène : demoun 28 péi l’érop i sava voté pou élir bann dépité éropéin. Si zot i pans lé pa inportan zot i pé dir azot kant mèm néna dann se l’érop-la plizyèr péi rish, émèm si néna désèrtin péi o flan total i fé in l’ansanm demoun néna z’ot pourkoi.

Néna d’moun néna z’ot pourkoi épi néna galman sak i tir lo dyab par la ké é an kantité. Néna bann la fèss an or, néna sak i apèl bann klass moiyène, épi néna sak lé dann lokisité. Suiv mon rogar é mi sar pa loin ! La Rényon néna son kota d’moun friké isi, néna galman sak i viv normalman, dizon éropéèneman, mé néna dmoun lé dann la mizèr : éropéin pov ! frans épov ! rényoné pov !

Pou kosa ? Pars néna désèrtin i ral tout la kouvèrtir larzan pou zot é néna in kantité i rèss pi granshoz pou zot. Sé pou sa, mi aprésyé bien lo kozman Iann la mète pou son list : ranplas l’érop larzan par l’érop pou d’moun (li di sa l’europe des gens). Mé mi trouv i tard kant mèm par la fote bann kaitalis é par la fote galman sak i dé zot lé libéral. Li béral ? Lib pou ésploit lé zot plito.

Tout fason moin lé sir é sèrtin l’érop l’ariv in karfour soi i kass soi i pass. I kas pars demoun lé désu, soi i pass pars li amors son viraz konm k’i fo. Viraz ? Oui pou lo sosyal : tro d’moun pov dann in bann lékonomi rish ! Oui pou l’anvironeman : l’érop lé résponsab la polisyon, la déstriksyon la natir ! La mor programé pou in ta é in paké zanimo ! Tro d’moun na poin lo dégré linstriksyon épi la kiltir k’i fo ! Tro d’moun bordé dann in kontinan rish.

Alor, mi rodi : soi i pass soi i kass é zéléksyon éropéène la pa in zéléksyon konm in n’ot, mé kékshoz i kont. Sanm pou moin !