Matant Zélida la ékrir Justin :
Mon shèr nové, mon spès salté,
M’a dir aou, fransh vérité, na in n’afèr la kontant amoin la somenn pasé. Vi doute a popré ? Moin lé sir bann rouj-de-fon la du gingn la pépiy pou in n’afèr konmsa. Vi oi a popré kosa mi vé dir ? Sé kan madam Lagarde la gingn lo post diréktris lo FMI (lo fon intèrnasyonal pou la moné). La, èl la fé valoir la ! El la fé valoir koi ? Biensir la Frans épi bann fanm. La Frans, pars kan mèm kozman èl la gingn lo post. Bann fanm, pars èl la amontr shemin dann in l’institisyon dominé par lo zonm. Moin, sak i kontant amoin ankor, sé ké bann madam na zot manyèr fé la politik é lo kèr i tienbo in gran plas dann zot éstil. Arzout èk sa, fanm épi solidèr i marsh ansanm, konm lo zo avèk la shèr. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi pans lé bien bann madam i pé okip in pé tout bann post inportan, pars sa i vé pétète dir la mantalité bann macho l’apré shanj in pé. Mé in pé solman ! Pars-in zour, na koz la dsi, si ou i vé — mi trouv bann fam i pèy in pé tro shèr zot mouvman pou l’égalité.
Astèr, si ni arvir in kou dési lo ka madam Lagarde. I pé di, sa in fanm solidèr. Biensir matant ! El lété solidèr lo diktatèr Ben Ali dann la Tinizi. Romark, la famiy Ben Ali té solidèr èk èl galman. Arpèl aou, dann l’aviyon, avèk kisa èl la bate karé an plin dann tan la révolisyon tinizyène. Arpèl aou ankor koman la famiy lo diktatèr la bien ède papa madam Lagarde dann son biznèss. Solidèr oui, bien solidèr vi k’èl té i propoz anvoy bann kass-an-fèr la Frans pou ède lo diktatèr an plin dann tan la révolisyon.
Solidèr oui, bien solidèr avèk Bernard Tapie, èl la fé gingn sépa konbien milyon san tro défann l’intéré larzan piblik. Solidèr oui, bien solidèr avèk bann rish la gonf zot pla avèk lo boukliyé fiskal, l’èr demoun té apré soufèr avèk la kriz.
In késtyon i tourn dann mon tète. Ala li la ! Vi kroi pa, avèk zéléksyon madam Lagarde, sa la pa in manyèr pou gouvèrnman fransé fé son zénufléksyon dovan Oncle Sam ? Anfin, mète in pé plis la Frans a-jnou dovan l’Amérik.

Justin