Zanbash, mon kamarad, la sone amoin tanto-la dann téléfone pou dir amoin, Obama la gingn zéléksyon. Sanm pou moin, lo boug té kontan. L’èr-la, moin la domann ali pou kosa li lété kontan konm sa. Moin la domann ali si lé té i atann in bon z’afèr pou zéléksyon-la. Silans dann téléfone ! Aprésa, li di amoin, li atann pa arien, li kont pa si arien... konm si pou èt kontan, i fo an avoir kékshoz pou gagné. Aprésa, li la di amoin : li lé kontan... pars li lé kontan é sak lé pa kontan i pran konstan.

Pou mon par, moin la di ali, mi trouv plis z’afèr pou arprosh lo boug ké z’afèr pou konplimant ali. Pars, boudikont, boug-la la amène in politik inpéryalis in pé partou. Li la pa arèt fé bonbardé dan l’Irak, dan l’Afganistan, dan la Libye, san konté tout mové z’aksion bann sèrvis ségré l’Amérik la fé in pé partou. Ziska fé tyé Ben Laden épi palank son kor dan la mèr, fé pas son kadav an profi é pèrt. Demoun konm moin té i atann ali dsi lo droi bann Paléstinien : zéro kalbas ! Té i atann ali dsi l’èd pou dévlop l’Afrik : zéro kalbas ! Té i atann ali pou libèr bann moun lé dann Guantanamo : zéro kalbas ! Bann z’amérikin pov té i atann in vré sékirité sosyal : zéro kalbas ! In bonpé z’amérikin té kont zot nora rogingn zot kaz bann bank la sézi : arvoir Pyèr ! Bann bank té i atann dolar an poundyak : zot la gingné ! Bann pov dan l’Amérik ? Zot la gouté !... La lis lé long, é nou arèt la.

Zanbash la réponn amoin, pou son par, li sava pa rod midi a katorz-èr. Kan li lé kontan, li lé kontan, in poin sé tou. Mé, li la kant mèm rod in lésplikasyon. Donk li la di amoin : li lé kontan in gro blan la gingn galo. Aprésa, li réspir in pé, pars solon li, si Obama té i pèrd, demoun noré di : "Noir, i fo pa kont dési !". In lésplikasyon ? I vo in not, mé lé kant mèm danzéré, pars rézone konm sa sé pèrd la rézon. Fé parl son kèr lé bon parfoi, mé si i pèrd la rézon, la, i pé ariv n’inport de koi.

Justin