« Lo bi avèk bann juif lété tyé tout. Lo bi avèk bann zésklav lété lo kontrèr : téi falé zot lété an plène form, an bone santé, pou gingn vann azot.. » Sak la di sa sé in madam Christine Angot, ékrivène d’apré sak i di épi kronikèz dann l’émisyon Laurent Ruquier.
Mé zami, mésyé, médam la sosyété, moin la pa antann lo lémisyon dabor pars sirman li la pass sé fout pa kèl èr épi kozman bann zintélo parizien la pa ditou mon tass kafé. Donk mi agard pa sa, mi ékout pa sa mé tazantan kan in kozman rant moun bien i fé lo buzz dann bann rézo sosyal, moin osi mi lir, é moin osi mi ésèye an avoir in l’opinyon la dsi.

An touléka si èl la di sak èl la di é i rosanm vréman èl la di, mi domann amoin kosa èl téi vé démontré pou kosa èl i fé lo konparézon rant dé kalité d’krime de mass konm sak la fé bann juif épi sak la fé bann zésklav. Bann juif la sibi in bann krime kont l’imanité é bann zésklav galman kan ou i koné la trète épi lésklavaz, par la loi, lé konsidéré konm krime kont l’imanité.
Madam-la son lang la troké, sa lé sir ! Mé moin la fine antann désèrtin apré di dé shoz konmsa pars sanm pou moin sa lé bien instalé dann zot koko. La pa in l’érèr, mé sinplomanin l’opinyon zot néna é li arsort sinploman kan zot i fé bate zot lang. Arzout èk sa, mi pans sak i pans konmsa i pans zot i fé l’imour.

Biensir, mon poinn vizé la pa pou démont son diskour pars son diskour i mérite pa sa. La kouyonis lé pa né avèk èl é sirman i mor ar pa avèk èl, mé réspèk in pé nout bann zansète, pars fransh vérité, nout kèr mèm zordi i singn ankor pou nout bann zansète viktime la trète épi lésklavaz. Si nout zyé i plèr kan ni rogard in fime dsi lésklavaz la pa pou arien, mé pars nout soufrans lé ankor la é sar la ankor pou dé tan é dé tan.