In kanpagn zéléksyon la fini yèr. In n’ot i komans so matin. Pou kosa ? Pou mète anlèr sinkant pèrsone dann La Rényon. Pou fé kosa tousa d’moun ? In komik fransé la di konmsa si bann zéléktèr i koné pa pou kosa so bann moun i prézant azot, inkyète pa lo bann kandida i koné pa non pli. Lé vré i sort donn in nom lo l’asanblé : i apèl pi konsèy zénéral, i apèl asanblé départmantal. Aprésa la vote an kat sis douz in bann konpétans pou zot, mé la pankor définitif pou vréman. La prèv ké zot i intérès pa tro lo gouvèrnman.

Donk kosa va résté ? Zis pou savoir si la popilasyon lé kontan lo gouvèrnman ou bien si li lé pa kontan. Donk zis do koi lo gouvèrnman pou ramas in batlavé é d’apré lo sondaz, i diré k’i vien. Na lo tan pou oir ; mé dann in somenn lo zé sar fé. Alon pa trakasé, pars si i kont dsi bann l’asanblé départmantal pou trouv in solisyon pou bann problèm, arvoir Pyèr, tak baro ! Pars lo l’asanblé nora poin granshoz pou désidé é sirtou li nora lo mank di motif di pourquoi pars késtyonn l’arzan, késtyonn bidzé, konm di lo kont li sar blizé sèr son sintir, inn-dé kran anplis.

Sak ni pé di par avans dsi bann gran késtyon konm lozman, travay, lédikasyon, shérté d’la vi, lite kont la povrété, problèm kann i domann ar pa li son poinn vizé. Pou li fé antann ali, li sar blizé kriy for é la pa sir li nora lo tan pars gouvèrnman va trouv tout sort pti késtyon pou okip son tan. Sé konmsa ou i pèrd de vu lo pli inportan, l’ésansyèl par l’fèt…